Kompania gjermane e shitjeve me pakicë të produkteve
teknike dhe të mirëmbajtjes së shtëpisë, Praktiker ka regjistruar rënie
me 68% të aksioneve në këtë vit, pas vendimit për t’u tërhequr nga
oferta e uljes së çmimit me 20% për çdo produkt. Ky vendim ka larguar
klientët, ka ndezur sinjalet e alarmit për fitimet dhe rezultoi me
largimin e drejtorit ekzekutiv të kompanisë.Sipas agjencisë së lajmeve Reuters, vetëm në ditën e Premte aksionet e Praktiker ranë me 22%, për shkak të frikës së shkrirjes së kompanisë dhe deklaratës së drejtorit ekzekutiv se do synojë të krijojë një fond 300 milionë euro për të investuar në rrjetin e dyqaneve në Gjermani dhe për të rikthyer fitimet e kompanisë.
Praktiker tha se do të mbyllë operacionet në Shqipëri dhe do të rishikojë edhe operacionet e tjera ndërkombëtare. Shefi i ri ekzekutiv i kompanisë, Thomas Fox tha për gazetarët se grupi po shikon të mbyllë rreth 30 dyqane në Gjermani nga të cilat do të humbasin vendin punës rreth 1 mijë e 400 punonjës.
Sipas raportit të Reuters, një analist i Commerzbank, shkroi në një memo për klientët se "lajmi është zhgënjyes dhe se gjithçka do të varet nga oferta për fonde të reja, për të cilat drejtori ekzekutiv, Thomas Fox nuk ofroi asnjë informacion”. Ndërsa shefi financiar i kompanisë, Markus Schuerholz, tha se grupi ka marrë një këshilltar të jashtëm për të parë mundësitë e gjetjes së burimeve të financimit. Në Shqipëri grupi i shitjeve me pakicë të produkteve industriale për përdorim shtëpiak është hapur në 30 Tetor të viti 2009. Në momentet e hapjes, grupi e cilësoi iniciativën si një “hapje për tregun e pa eksploruar të Shqipërisë” dhe “një treg pa një model krahasues për këtë sektor, pasi nuk ka një operator kombëtar apo ndërkombëtar në të gjithë Shqipërinë”.
[Scan TV]