Deri në fund të vitit 2009, borxhi i jashtëm i Shqipërisë arriti në 3.3 miliardë euro, ose sa 38.2 % e Prodhimit të Brendshëm Bruto
Rritja më e madhe gjatë viteve 2008 dhe 2009 me rreth 1 miliard euro. Ndikim në rritjen e borxhit ka edhe ndryshimi i kursit të këmbimit
Për çdo një euro që qarkullon në vend, rreth 38 cent të saj janë borxh ndaj shteteve apo bankave të huaja. Të dhënat më të fundit nga Banka e Shqipërisë raportojnë për shifra në rritje të borxhit të jashtëm të Shqipërisë. Deri në fund të vitit 2009, Shqipëria rezulton me një borxh të jashtëm prej 3.3 miliardë euro, e cila përkon me 38.2 për qind të Prodhimit të Brendshëm Bruto.
Krahasuar me treguesit e një viti më parë, mësohet se vetëm gjatë vitit 2009, stoku i borxhit të jashtëm është rritur me 230 milionë lekë. Në një raport në të cilin merr në shqyrtim vijueshmërinë e borxhit të jashtëm të vendit nga viti 2003 deri në atë 2009, Banka e Shqipërisë përmend dy vitet e fundit të kësaj periudhë gjatë së cilës borxhi ka njohur një rritje të ndjeshme. Mësohet se vetëm gjatë vitit 2008, borxhi i jashtëm është rritur me rreth 1 miliard euro ose me rreth 47 për qind krahasuar me vitin 2007. Ndërkohë, gjatë viteve të tjera, rritja vjetore e borxhit është luhatur rreth nivelit 200 milionë euro.
"Pesha e borxhit afatgjatë ndaj totalit të borxhit ka ardhur në rënie të vazhdueshme nga fundi i vitit 2003 deri në fund të vitit 2008, por ka shënuar një rritje të dukshme nga 60 për qind në rreth 70 për qind të totalit gjatë vitit 2009", - citon Banka Qendrore në bilancin e saj.
Gjatë periudhës së marrë në shqyrtim, është sektori i qeverisë së përgjithshme ai që mban peshën kryesore të këtij borxhi. Deri në fund të vitit 2009, stoku i borxhit për këtë sektor arriti në 1.6 miliardë euro, e cila është sa gjysma e totalit të borxhit të jashtëm bruto.
Rritjen më të madhe, borxhi i qeverisë e ka shënuar në vitin 2008 me 34 për qind dhe në vitin 2009 me 24 për qind. Këto dy vite është edhe periudha kur qeveria shpenzoi shuma të mëdha në investimet publike, ku një ndër projektet me harxhimet më të mëdha ishte rruga Durrës-Kukës.
Pjesë e raportit të bankës janë edhe treguesit e kursit të këmbimit, të cilat nuk kanë qenë në favor të lekut. Në fund të vitit 2008, kursi i këmbimit ishte 123.8 lekë/euro, ndërsa në fund të vitit 2009 ky tregues arriti mesatarisht në 138 lekë/euro. Diferenca midis dy viteve është një kosto shtesë për shërbimin e borxhit.
Referuar treguesve të paraqitura nga qeveria në kuadrin makro-ekonomik 2011-2013, deri në fund të vitit 2010 borxhi publik arrin në nivelin e 731 miliardë lekëve, nga të cilat 273 miliardë janë marrë në tregun e jashtëm, ndërsa 447 miliardë lekë janë borxh i brendshëm.
Pritet që ky borxh të rritet edhe më tej gjatë viteve 2011-2013. Deri në fund të vitit të ardhshëm, qeveria parashikon një borxh publik total deri në 777 miliardë lekë, në vitin 2012 pritet të arrijë në 813 miliardë, ndërsa në fund të 2013-s, shifra parashikohet të shkojë në 858 miliardë lekë.
Në raportin e saj, banka përmend edhe rritjen e shpejtë të investimeve të huaja gjatë gjysmës së dytë të kësaj dekade duke dyfishuar peshën e tyre ndaj Prodhimit të Brendshëm Bruto.
Përgjatë viteve 2003-2004, investimet e huaja ishin në nivelin e 4 për qind të PBB-së, ndërsa në vitin 2009, këto tregues arritën në 8 për qind. Bankat dhe telekomunikacioni janë dy sektorët në të cilat rezulton një përqendrim më i madh i investimeve të huaja, ndërkohë që në vend të tretë rezulton industria. Shtetet kryesore nga të cilat ka hyrë kapitali i huaj në Shqipëri, sipas madhësisë së stokut janë Greqia, Turqia, Austria dhe Italia.
